ပြည်ထောင်စုဝန်ကြီး ဦးမောင်မောင်အုန်းနှင့် ပြည်ထောင်စုဝန်ကြီး ဦးမြင့်ကြိုင်တို့ အခမ်းအနား တက်ရောက်လာကြသူများနှင့်အတူ ၂၀၂၄ ခုနှစ်၊
လူဦးရေနှင့် အိမ်အကြောင်းအရာ သန်းခေါင် စာရင်းကောက်ယူခြင်းလုပ်ငန်းဆိုင်ရာ ရုပ်မြင်သံကြား ဉာဏ်စမ်းပဟေဠိပြိုင်ပွဲ ကျင်းပနေမှုကို ကြည့်ရှုအားပေး။
နေပြည်တော်၊ ဩဂုတ် ၂၀ ။
ပြန်ကြားရေးဝန်ကြီးဌာန မြန်မာ့အသံနှင့် ရုပ်မြင်သံကြား၊ လူဝင်မှုကြီးကြပ်ရေးနှင့် ပြည်သူ့ အင်အားဝန်ကြီးဌာန၊ ပြည်သူ့အင်အားဦးစီးဌာနနှင့် ပညာရေးဝန်ကြီးဌာန၊ အခြေခံပညာ ဦးစီးဌာနတို့ ပူးပေါင်းစီစဉ်ဆောင်ရွက်သည့် ၂၀၂၄ ခုနှစ်၊ လူဦးရေနှင့် အိမ်အကြောင်းအရာ သန်းခေါင်စာရင်း ကောက်ယူခြင်းလုပ်ငန်းဆိုင်ရာ ရုပ်မြင်သံကြား ဉာဏ်စမ်းပဟေဠိပြိုင်ပွဲကို ယနေ့ နံနက်ပိုင်းက နေပြည်တော် တပ်ကုန်းမြို့ရှိ မြန်မာ့အသံနှင့် ရုပ်မြင်သံကြား၌ ကျင်းပသည်။
အဆိုပါ ရုပ်မြင်သံကြားဉာဏ်စမ်းပဟေဠိပြိုင်ပွဲသို့ ပြန်ကြားရေးဝန်ကြီးဌာန ပြည်ထောင်စု ဝန်ကြီး ဦးမောင်မောင်အုန်း၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်ထောင်စု ဝန်ကြီး ဦးမြင့်ကြိုင်၊ ဒုတိယဝန်ကြီး ဒေါက်တာမျိုးသန့်၊ ပညာရေးဝန်ကြီးဌာန ဒုတိယဝန်ကြီး ဒေါက်တာဇော်မြင့်၊ ပြန်ကြားရေးဝန်ကြီးဌာန၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီး ဌာန၊ ပညာရေးဝန်ကြီးဌာနတို့မှ ဌာနဆိုင်ရာအကြီးအကဲများနှင့်ဝန်ထမ်းများ၊ ပြိုင်ပွဲဝင် ကျောင်းသား၊ ကျောင်းသူများနှင့် ဆရာ၊ ဆရာမများ၊ MRTV၊ အခြေခံပညာအထက်တန်း ကျောင်းမှ ကျောင်းသား ကျောင်းသူများ၊ ပြည်သူအားလုံးပါဝင်လို့ သန်းခေါင်စာရင်းကောက်ကြစို့ ဆောင်းပါးပြိုင်ပွဲမှ ဆုရရှိသူများနှင့် ဖိတ်ကြားထားသူများ တက်ရောက်ကြသည်။
ဦးစွာ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၊ ပြည်သူ့အင်အားဦးစီးဌာနမှ ဝန်ထမ်းများက “နိုင်ငံ့အကျိုးမျှော်ကိုးရည် သန်းခေါင်စာရင်း ကောက်ကြမည်” တေးသီချင်းဖြင့် ဖျော်ဖြေတင်ဆက်ကြသည်။
ထို့နောက် ၂၀၂၄ ခုနှစ်၊ လူဦးရေနှင့် အိမ်အကြောင်းအရာ သန်းခေါင်စာရင်းကောက်ယူ ခြင်းလုပ်ငန်းဆိုင်ရာ “ရေဒီယိုဉာဏ်စမ်းပဟေဠိပြိုင်ပွဲ” ယှဉ်ပြိုင်မှု ပုံရိပ်များ Video Clip ကို ပြသပြီး ပြိုင်ပွဲတွင် ပါဝင်ယှဉ်ပြိုင်ကြမည့် ကျောင်းသား ကျောင်းသူ (၁၀)ဦးတို့က တစ်ဦးချင်း မိတ်ဆက်ကြသည်။
ဆက်လက်၍ “ရုပ်မြင်သံကြားဉာဏ်စမ်းပဟေဠိပြိုင်ပွဲ” အစီအစဉ်ကို Round လေးခုဖြင့် ကျင်းပရာ Round (1) တွင် ဘာသာရပ်ဆိုင်ရာ မေးခွန်း(၁၀)ခုကို အဖြေမှန်ရွေးချယ်ခြင်းဖြင့် လည်းကောင်း၊ Round (2) တွင် ဘာသာရပ်ဆိုင်ရာ မေးခွန်း(၁၀)ခုကို အမှား/ အမှန် ရွေးချယ် ခြင်းဖြင့်လည်းကောင်း၊ Round (3) တွင် ဘာသာရပ်ဆိုင်ရာ မေးခွန်း(၁၀)ခုကို ကွက်လပ်ဖြည့် နည်းဖြင့် လည်းကောင်း၊ Round (4) တွင် ရုပ်မြင်သံကြားဆိုင်ရာ မေးခွန်း(၁၀)ခုကို TV Spot နှင့် တေးသီချင်းများ ဖွင့်လှစ်ပြသမှုဖြင့်လည်းကောင်း ကျောင်းသား၊ ကျောင်းသူ (၁၀)ဦးတို့က ပါဝင် ယှဉ်ပြိုင်ဖြေဆိုကြသည်။
ယင်းနောက် ဗဟိုသန်းခေါင်စာရင်းကော်မရှင် ဥက္ကဋ္ဌ ပြည်ထောင်စုဝန်ကြီး ဦးမြင့်ကြိုင်က အမှာစကားပြောကြားရာတွင် ပြည်လုံးကျွတ်သန်းခေါင်စာရင်းအောင်မြင်စွာ ကောက်ယူနိုင်ရေး အတွက် ယခုအခါ ပြည်သူလူထုအသိပညာပေးလုပ်ငန်းများကို တိုင်းဒေသကြီး၊ ပြည်နယ်အလိုက် ကျယ်ကျယ်ပြန့်ပြန့် ဆောင်ရွက်လျက်ရှိပါကြောင်း၊ ယခုလည်း မိမိတို့ဝန်ကြီးဌာနနှင့် ပြန်ကြားရေးဝန်ကြီးဌာန၊ ပညာရေးဝန်ကြီးဌာနတို့ပူးပေါင်းကာ ဉာဏ်စမ်းပဟေဠိပြိုင်ပွဲကျင်းပ ခြင်းဖြစ်ရာ ပြိုင်ပွဲဝင် ကျောင်းသား၊ ကျောင်းသူများနှင့် ပံ့ပိုးကူညီဆောင်ရွက်ပေးသူအားလုံးကို ကျေးဇူးတင်ရှိပါကြောင်း။
သန်းခေါင်စာရင်းကို မြန်မာနိုင်ငံတွင် ၂၀၂၄ ခုနှစ်၌ ရှိသည့် ခန့်မှန်းလူဦးရေ ၅၆ သန်းကျော် နှင့် ခန့်မှန်းအိမ်ထောင်စု (၁၃)သန်းခန့်ကို အခြေခံတွက်ချက်ကောက်ယူမည်ဖြစ်ပြီး သန်းခေါင် စာရင်းကောက်ယူရန် သန်းခေါင်စာရင်းရည်ညွှန်းချိန်ကို ၂၀၂၄ ခုနှစ်၊ စက်တင်ဘာ (၃၀)ရက်၊ ည သန်းခေါင်ယံအချိန်ကို သတ်မှတ်ထားပါကြောင်း၊ တစ်နိုင်ငံလုံးအတိုင်းအတာဖြင့် စာရင်းကောက်ကွက်ပေါင်း တစ်သိန်းတစ်သောင်းခန့်ရှိမည်ဖြစ်ရာ သန်းခေါင်စာရင်း ကောက်ယူ ရာတွင် စာရင်းစစ် ၊ စာရင်းကောက် လေးသောင်းနှစ်ထောင်ခန့်ဖြင့် ကောက်ယူဆောင်ရွက်ရန် လျာထားပါကြောင်း၊ သန်းခေါင်စာရင်းကို အိမ်ထောင်စုမေးခွန်းပုံစံအတွက် မေးခွန်း(၆၈)ခု၊ အဖွဲ့အစည်းမေးခွန်းပုံစံ အတွက် မေးခွန်း(၁၈)ခုဖြင့် တစ်အိမ်တက်ဆင်းကောက်ယူမည်ဖြစ်ရာ ပြည်သူများအနေဖြင့် စာရင်းစစ်၊ စာရင်းကောက်များ၏မေးမြန်းသည့် မေးခွန်းများကို မှန်မှန်ကန်ကန်ဖြေကြားခြင်းဖြင့် ပူးပေါင်းပါဝင်ကူညီ ဆောင်ရွက်နိုင်ရေးအတွက် ပြည်သူ လူထုအသိပညာပေးလုပ်ငန်းကိုလည်း ထိထိရောက်ရောက်ရောက်ဆောင်ရွက်လျက်ရှိပါကြောင်း၊ ယခုသန်းခေါင်စာရင်းကို နည်းပညာအသုံးပြု၍ Mobile Tablet များဖြင့်ကောက်ယူပြီး ရုံးချုပ်သို့ Online စနစ်ဖြင့် ပေးပို့ဆောင်ရွက်မည်ဖြစ်သည့်အတွက် အချက်အလက်များကို မှန်မှန် နှင့်မြန်မြန် သိရှိနိုင်မည်ဖြစ်ပြီး ရှေ့ပြေးလူဦးရေစာရင်းကို အချိန်တိုတိုအတွင်း သိရှိထုတ်ပြန်နိုင် မည်ဖြစ်ပါကြောင်း၊ ယင်းအချက်အလက်များကို မကြာမီကျင်းပတော့မည့် အထွေထွေ ရွေးကောက်ပွဲတွင် အဓိကကျသည့် မှန်ကန်သောမဲစာရင်းပြုစုနိုင်ရေးအတွက် အထောက်အကူပြု အသုံးပြုဆောင်ရွက်သွားမည်ဖြစ်ပါကြောင်း၊ ယင်းလုပ်ငန်းစဉ်အောင်မြင်ရေးအတွက် နိုင်ငံတော် အစိုးရနှင့် ပြည်သူအားလုံးပူးပေါင်းဆောင်ရွက်ကြရမည်ဖြစ်ရာ လုပ်ငန်းစဉ်ဆောင်ရွက်မှုကို ပြည်သူများ သိရှိနားလည်လိုက်ပါဆောင်ရွက်နိုင်ရေးအတွက် ယခုကဲ့သို့ ပြည်သူလူထု အသိပညာပေးလုပ်ငန်းများအား ကျယ်ကျယ်ပြန့်ပြန့် ဆောင်ရွက်ခြင်းဖြစ်ပါကြောင်း ဆွေးနွေး ပြောကြားသည်။
ထို့နောက် မြန်မာ့အသံနှင့်ရုပ်မြင်သံကြား ဝန်ထမ်းများက ၂၀၂၄ ခုနှစ်၊ လူဦးရေနှင့်အိမ် အကြောင်းအရာ သန်းခေါင်စာရင်းကောက်ယူခြင်းလုပ်ငန်းဆိုင်ရာ လှုံ့ဆော်တေးများဖြစ်သည့် “သမိုင်းမှတ်တိုင်း စိုက်ထူနိုင်ပြီ” တေးသီချင်းနှင့် “ကျေးဇူးပြု၍ဖြေပေးပါ” တေးသီချင်းတို့ဖြင့် ဖျော်ဖြေတင်ဆက်ကြသည်။
ယင်းနောက် ပြည်ထောင်စုဝန်ကြီး ဦးမြင့်ကြိုင်က “ရုပ်မြင်သံကြားဉာဏ်စမ်းပဟေဠိ ပြိုင်ပွဲတွင် ပူးတွဲပထမဆုရရှိကြသည့် မကဗျာထက်နိုင်နှင့် မခင်နေခြည်ထွန်းတို့အား လည်းကောင်း၊ ပူးတွဲဒုတိယဆုရရှိကြသည့် မောင်အောင်လင်းခန့်၊ မကေသရီစိုးစံနှင့် မနှင်းဧပရယ်မိုးတို့အားလည်းကောင်း၊ အထူးဆုရရှိသူ ငါးဦးတို့အားလည်းကောင်း ဆုတံဆိပ်၊ ဆုငွေနှင့် ဂုဏ်ပြုမှတ်တမ်းများ ပေးအပ်ချီးမြှင့်သည်။
ဆက်လက်၍ ပြည်ထောင်စုဝန်ကြီး ဦးမြင့်ကြိုင်က ၂၀၂၄ ခုနှစ်၊ လူဦးရေနှင့်အိမ် အကြောင်းအရာ သန်းခေါင်စာရင်းကောက်ယူခြင်းလုပ်ငန်းဆိုင်ရာ လှုံ့ဆော်ရေးလုပ်ငန်းများတွင် ပူးပေါင်းပါဝင်ဆောင်ရွက်ပေးကြသော ပြန်ကြားရေးဝန်ကြီးဌာန မြန်မာ့အသံနှင့်ရုပ်မြင်သံကြား နှင့် ပညာရေးဝန်ကြီးဌာန အခြေခံပညာဦးစီးဌာနတို့အား ဂုဏ်ပြုလက်မှတ်များပေးအပ်ချီးမြှင့်ရာ မြန်မာ့အသံနှင့်ရုပ်မြင်သံကြား ညွှန်ကြားရေးမှူးချုပ် ဦးရဲနိုင်နှင့် အခြေခံပညာဦးစီးဌာန ဒုတိယ ညွှန်ကြားရေးမှူးချုပ် ဒေါက်တာ စိုးမြင့်ထွန်းတို့က လက်ခံရယူကြသည်။
ထို့နောက် “နိုင်ငံ့အကျိုးမျှော်ကိုးရည် သန်းခေါင်စာရင်းကောက်ကြမည်” တေးသီချင်း အသစ်တစ်ပုဒ်ကို မေတ္တာဖြင့်တီးခတ်ပေးသော မြဝတီရုပ်မြင်သံကြားအဖွဲ့နှင့် ၎င်းသီချင်းအား မေတ္တာဖြင့်ရေးစပ်သီကုံးပေးသော ဦးသိန်းရွှေဝင်းတို့အား ဂုဏ်ပြုလက်မှတ်များ ပေးအပ်ချီးမြှင့် သည်။
ဆက်လက်၍ ပြည်ထောင်စုဝန်ကြီး ဦးမောင်မောင်အုန်းက “ပြည်သူအားလုံး ပါဝင်လို့ သန်းခေါင်စာရင်းကောက်ကြစို့” ဆောင်းပါးပြိုင်ပွဲ (အလွတ်တန်းအဆင့်) တွင် ဆုရရှိသူငါးဦးတို့ အားလည်းကောင်း၊ ပညာရေးဝန်ကြီးဌာန ဒုတိယဝန်ကြီး ဒေါက်တာဇော်မြင့်က ဆောင်းပါး ပြိုင်ပွဲ (ဝါသနာရှင်အဆင့်) တွင် ဆုရရှိသူငါးဦးတို့အားလည်းကောင်း ဆုများပေးအပ်ချီးမြှင့်ကြ သည်။
ထို့နောက် ပြည်ထောင်စုဝန်ကြီးများနှင့် အဖွဲ့ဝင်များက ရုပ်မြင်သံကြားဉာဏ်စမ်းပဟေဠိ ပြိုင်ပွဲဝင်ကျောင်းသား ကျောင်းသူများ၊ ဆောင်းပါးပြိုင်ပွဲဝင် (အလွတ်တန်းနှင့်ဝါသနာရှင်) အဆင့်ဆုရရှိသူများ၊ ဒိုင်အဖွဲ့ဝင်များနှင့်အတူ စုပေါင်းမှတ်တမ်းတင်ဓာတ်ပုံရိုက်ကြသည်။
ယင်းနောက် ပြည်ထောင်စုဝန်ကြီးနှင့်အဖွဲ့ဝင်များသည် မြန်မာ့အသံနှင့်ရုပ်မြင်သံကြား စားရိပ်သာ၌ ဆုရရှိကြသူများ၊ ပြိုင်ပွဲဝင်များ၊ တာဝန်ရှိသူများ၊ ဖိတ်ကြားထားသူများနှင့်အတူ နေ့လယ်စာသုံးဆောင်ကြသည်။
မွန်းလွဲပိုင်းတွင် ရုပ်မြင်သံကြားဉာဏ်စမ်းပဟေဠိ ပြိုင်ပွဲဝင်ကျောင်းသား ကျောင်းသူများ၊ ဆောင်းပါးပြိုင်ပွဲ (အလွတ်တန်းနှင့် ဝါသနာရှင်) အဆင့် ဆုရရှိသူများ၊ ပြည်သူ့အင်အားဦးစီးဌာန မှ ဝန်ထမ်းများသည် နေပြည်တော်တပ်ကုန်းမြို့ရှိ မြန်မာ့အသံနှင့် ရုပ်မြင်သံကြားမှ News Channel Studio နှင့် Farmer’s Channel Studio တို့တွင် သတင်းရိုက်ကူးထုတ်လွှင့်မှုများကို လည်းကောင်း၊ မြန်မာ့အသံနှင့်ရုပ်မြင်သံကြား စိန်ရတုပြတိုက်တွင် ခင်းကျင်းပြသထားရှိမှုများကို လည်းကောင်း စိတ်ပါဝင်စားစွာ ကြည့်ရှုလေ့လာကြသည်။
၂၀၂၄ ခုနှစ်၊ လူဦးရေနှင့်အိမ်အကြောင်းအရာ သန်းခေါင်စာရင်းကောက်ယူမှုလုပ်ငန်းစဉ် ကို အောက်တိုဘာ ၁ ရက်မှ ၁၅ ရက်ထိ နိုင်ငံတစ်ဝန်းလုံးတွင် ဆောင်ရွက်ကြမည်ဖြစ်ရာ အဆိုပါ လုပ်ငန်းစဉ်အပေါ် ပြည်သူများစိတ်ဝင်စားမှုပိုမိုရရှိပြီး ပါဝင်ဆောင်ရွက်လာနိုင်ရေးနှင့် အသိပညာ မျှဝေရန်အတွက် လူထုလှုပ်ရှားမှုတစ်ခုအဖြစ် ပြန်ကြားရေးဝန်ကြီးဌာန မြန်မာ့အသံနှင့်ရုပ်မြင် သံကြား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၊ ပြည်သူ့အင်အားဦးစီးဌာနနှင့် ပညာရေးဝန်ကြီးဌာန၊ အခြေခံပညာဦးစီးဌာနတို့ ပူးပေါင်းဆောင်ရွက်မှုဖြင့် အခြေခံပညာအဆင့် အသက် ၁၄ နှစ်မှ ၁၇ နှစ်အထိ ကျောင်းသား၊ ကျောင်းသူ ငါးဦးစီ ပါဝင်ယှဉ်ပြိုင်သည့် ရေဒီယို ဉာဏ်စမ်းပဟေဠိပွဲစဉ် ငါးပွဲကို ၂၀၂၄ ခုနှစ်၊ မတ်လမှ စတင်၍ ဇူလိုင်လအထိ နေပြည်တော်နှင့် ရန်ကုန်တွင် လစဉ်ကျင်းပခဲ့ပြီး အဆိုပါပြိုင်ပွဲများမှ ပထမနှင့် ဒုတိယဆုရရှိကြသည့် ကျောင်းသား ကျောင်းသူ ၁၀ ဦးတို့က ယနေ့ကျင်းပသည့် ၂၀၂၄ ခုနှစ်၊ လူဦးရေနှင့်အိမ်အကြောင်းအရာ သန်းခေါင်စာရင်း ကောက်ယူမှုလုပ်ငန်းဆိုင်ရာ ရုပ်မြင်သံကြားဉာဏ်စမ်းပဟေဠိပြိုင်ပွဲတွင် ပါဝင်ယှဉ်ပြိုင်ကြခြင်းဖြစ်သည်။
အဆိုပါ ရုပ်မြင်သံကြား ဉာဏ်စမ်းပဟေဠိပြိုင်ပွဲကျင်းပပုံများကို ယနေ့ည ၈ နာရီသတင်း များအပြီး ည ၉ နာရီခန့်တွင် မြန်မာ့ရုပ်မြင်သံကြား MRTV HD Channel မှ ထုတ်လွှင့်ပြသမည် ဖြစ်ကြောင်းသိရသည်။ (-)
Sorry, the comment form is closed at this time.