ပြည်ထောင်စုဝန်ကြီးဦးမြင့်ကြိုင်၊ ကော့သောင်းခရိုင်အတွင်းရှိ ဝန်ထမ်းများအား တွေ့ဆုံမှာကြား၊ ပန်းခင်းစီမံချက်အဆင့်(၃)နှင့် Biometric ကောက်ယူမှု
လုပ်ငန်းဆောင်ရွက်မှုကြည့်ရှုအားပေး၊ နယ်စပ်ဂိတ်များ၌ လူဝင်မှုစစ်ဆေးရေးလုပ်ငန်းများ ဆောင်ရွက်နေမှုလှည့်လည်ကြည့်ရှု
နေပြည်တော်၊ ဇန်နဝါရီ ၂၅ ။
လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာန ပြည်ထောင်စုဝန်ကြီး ဦးမြင့်ကြိုင်သည် တာဝန်ရှိသူများနှင့်အတူ ဇန်နဝါရီလ (၂၅)ရက်၊ ယနေ့နံနက် (၁၀) နာရီက တနင်္သာရီတိုင်း ဒေသကြီး၊ ကော့သောင်းမြို့ရှိ မဉ္ဇူသကခန်းမ၌ လူဝင်မှုကြီးကြပ်ရေးနှင့်ပြည်သူ့အင်အား ဝန်ကြီးဌာန၊ ကော့သောင်းခရိုင်နှင့် မြို့နယ်ဦးစီးမှူးရုံးနှင့် လူဝင်မှုကြီးကြပ်ရေး ဒုတိယဌာနခွဲ (ကော့သောင်း)တို့မှ ဝန်ထမ်းများအား တွေ့ဆုံသည်။
ထိုသို့တွေ့ဆုံရာတွင် ပြည်ထောင်စုဝန်ကြီးက ဝန်ကြီးဌာန၏ ရည်မှန်းချက်လုပ်ငန်းတာဝန်များ အကောင်အထည်ဖော်ဆောင်ရွက်နေမှု၊ လက်ရှိအခြေအနေတွင် နိုင်ငံတော်အတွက် အရေးကြီးပြီး မဖြစ်မနေအောင်မြင်အောင် ဆောင်ရွက်ရမည့် မြေပြင်ကွင်းဆင်းစာရင်းကောက်ယူခြင်းလုပ်ငန်း၊ ပန်းခင်းစီမံချက်များဖြင့် နိုင်ငံသားစိစစ်ရေးကတ်ပြားထုတ်ပေးခြင်းလုပ်ငန်း၊ e-ID စနစ်အတွက် Biographic/Biometric ကောက်ယူခြင်းလုပ်ငန်းနှင့် ၂၀၂၄ ခုနှစ်၊ ပြည်လုံးကျွတ်သန်းခေါင် စာရင်းကောက်ယူခြင်းလုပ်ငန်းများ ဆောင်ရွက်နေမှု၊ ယင်းလုပ်ငန်းစဉ်များ အောင်မြင်ရေးအတွက် မိမိတို့ဌာနဝန်ထမ်းများနှင့် ဆက်စပ်ဌာနများ ပေါင်းစပ်ညှိနှိုင်းဆောင်ရွက်နေမှု၊ ကော့သောင်းဒေသ သည် ထိုင်းနိုင်ငံနှင့် ရေလမ်းကြောင်းဖြင့် ဆက်စပ်နေသည့် နိုင်ငံတကာ ဝင်/ထွက် ပေါက်ဖြစ်သည် နှင့်အညီ လူဝင်မှုကြီးကြပ်ရေးလုပ်ငန်းများကို လုပ်ထုံးလုပ်နည်းနှင့် တိကျမှန်ကန်စွာစနစ်တကျ ဆောင်ရွက်ကြရေး၊ တစ်ဖက်နိုင်ငံသို့ သွားရောက်အလုပ်လုပ်ကိုင်ကြသည့် မြန်မာအလုပ်သမားများ အားလူဝင်မှုကြီးကြပ်ရေးဆိုင်ရာ လုပ်ထုံးလုပ်နည်းနှင့်အညီ ဝင်/ထွက် သွားလာအလုပ်လုပ်ကိုင် နိုင်ရေးအတွက် စီစဉ်ဆောင်ရွက်ပေးနိုင်ရေးအခြေအနေ၊ ဝန်ထမ်းအချင်းချင်း အထက်/အောက် အပြန်အလှန်ယုံကြည်လေးစား၍ စည်းလုံးညီညွတ်စွာဖြင့် ပေးအပ်သည့်တာဝန်များကို ကျေပွန်စွာ ထမ်းဆောင်နိုင်ရေးအခြေအနေများနှင့်စပ်လျဉ်း၍ အကျယ်တဝင့်ရှင်းလင်းမှာကြားကာ ဝန်ထမ်းများ၏ လုပ်ငန်းဆိုင်ရာတင်ပြချက်များအပေါ် လိုအပ်သည်များ ညှိနှိုင်းဖြည့်ဆည်း ဆောင်ရွက်ပေးသည်။
ထိုမှတစ်ဆင့် ပြည်ထောင်စုဝန်ကြီး ဦးမြင့်ကြိုင်သည် တနင်္သာရီတိုင်းဒေသကြီးဝန်ကြီးချုပ် ဦးမြတ်ကိုနှင့်တာဝန်ရှိသူများနှင့်အတူ ကော့သောင်းမြို့နယ် အထွေထွေအုပ်ချုပ်ရေးဦးစီးဌာန၊ ဟံသာဝတီခန်းမသို့သွားရောက်၍ အဆိုပါခန်းမ၌ လူဝင်မှုကြီးကြပ်ရေးနှင့်ပြည်သူ့အင်အား ဝန်ကြီးဌာန၊ ကော့သောင်းမြို့နယ်ဦးစီးမှူးရုံးမှ ဝန်ထမ်းများက ဒေသခံပြည်သူများအား ပန်းခင်း စီမံချက်အဆင့်(၃)ဖြင့် နိုင်ငံသားကတ်ပြားဆောင်ရွက်ပေးခြင်း၊ e-IDစနစ်ဖြင့် Biographic/ Biometric ကောက်ယူခြင်းလုပ်ငန်း (One Stop Service) ဆောင်ရွက်ပေးနေမှုနှင့် မြို့နယ်ရုံးမှ နိုင်ငံသားကတ်ထုတ်ပေးမှုမှတ်ပုံတင်စာအုပ် (နိုင်-၄)ပါအချက်အလက်များအား ရုံးချုပ်Server အတွင်း ထည့်သွင်းထားသည့်အချက်အလက်များနှင့် ကိုက်ညီမှုရှိ/မရှိ တိုက်ဆိုင်စိစစ် အတည်ပြု ဆောင်ရွက်နေမှုအခြေအနေများကို လှည့်လည်ကြည့်ရှုအားပေးကြသည်။
ထို့နောက် ပြည်ထောင်စုဝန်ကြီးက လုပ်ငန်းများ မှန်ကန်မြန်ဆန်စွာ ဆောင်ရွက်ပေးနိုင်ရေး နှင့် လုပ်ထုံးလုပ်နည်းနှင့်အညီ စနစ်တကျ စစ်ဆေးဆောင်ရွက်ရေးတာဝန်ရှိသူများအား မှာကြားကာ လိုအပ်သည်များညှိနှိုင်းဆောင်ရွက်ပေးပြီး လုပ်ငန်းများလာရောက် ဆောင်ရွက်ကြသည့် ဒေသခံ ပြည်သူများအား ရင်းရင်းနှီးနှီး နှုတ်ဆက်အားပေးသည်။
အဆိုပါ အခမ်းအနားတွင် လာရောက်ဆောင်ရွက်သည့် ဒေသခံပြည်သူများအနက် နိုင်ငံသား ကတ်ပြားမရှိသေးသူများ၊ ပျောက်ဆုံး/ပျက်စီး၍ ပြန်လည်လျှောက်ထားသူများအား ပန်းခင်းစီမံချက် အဆင့်(၃)ဖြင့် နိုင်ငံသားစိစစ်ရေးကတ်ပြားထုတ်ပေးပြီးနောက် e-ID စနစ်အတွက် ကိုယ်ရေး အချက်အလက် (Biographic)နှင့် ဇီဝဆိုင်ရာအချက်အလက်(Biometric)များ ကောက်ယူခြင်း လုပ်ငန်းကို တပါတည်းဆောင်ရွက်ပေးပြီး နိုင်ငံသားကတ်ရှိပြီးသူများအား Biographic / Biometric များကောက်ယူ၍ e-ID စနစ် အတွက် ဂဏန်း(၁၀)လုံးပါ Unique ID နံပါတ်ထုတ်ပေးခြင်း လုပ်ငန်းကို တစ်နေရာတည်းတွင် တပါတည်း ဆောင်ရွက်ပေးခြင်းဖြစ်ရာ နိုင်ငံသားကတ်မရှိသူ (၄၁)ဦးအား နိုင်ငံသားကတ်ထုတ်ပေးခဲ့ပြီး နိုင်ငံသားကတ်ရှိပြီးသူ(၃၀)ဦးနှင့်အတူ စုစုပေါင်း (၇၁)ဦး အား e-ID စနစ် ဆောင်ရွက်ပေး၍ Unique ID နံပါတ်များ အသီးသီးထုတ်ပေးနိုင်ခဲ့သည်။
မွန်းလွဲပိုင်းတွင် ပြည်ထောင်စုဝန်ကြီးနှင့်တိုင်းဒေသကြီးဝန်ကြီးချုပ်တို့သည် ကော့သောင်း မြို့၊ ရွှေဝက်ဝံတံတားအနီးရှိ အလုပ်သမားဝန်ကြီးဌာန၊ ရွှေ့ပြောင်းအလုပ်သမားရုံး၊ MoU U-Turn ဆောင်ရွက်ပေးသည့် စခန်းသို့သွားရောက်၍ MoU U-Turn အလုပ်သမားများအတွက် OWIC ကတ် ထုတ်ပေးနိုင်ရန် လူဝင်မှုကြီးကြပ်ရေးဒုတိယဌာနခွဲမှ ဝန်ထမ်းမျာက e- ID စနစ်ဖြင့် နိုင်ငံသား စိစစ် အတည်ပြုဆောင်ရွက်နိုင်ရေး စက်ပစ္စည်းများ တပ်ဆင်ပြီးစီးမှုနှင့် ဆောင်ရွက်မည့် လုပ်ငန်းစဉ် အဆင့်ဆင့်ကို ကြည့်ရှုစစ်ဆေးရာ တာဝန်ရှိသူများက လိုက်လံရှင်းလင်းတင်ပြကြပြီး ပြည်ထောင်စု ဝန်ကြီးက လုပ်ငန်းများအဆင်ပြေစွာ ဆောင်ရွက်နိုင်ရေးအတွက် အလုပ်သမားဝန်ကြီးဌာနမှ ဝန်ထမ်းများနှင့် ညှိနှိုင်းပေါင်းစပ်ဆောင်ရွက်ရန်မှာကြားကာ စခန်းအတွင်းလှည့်လည်ကြည့်ရှု စစ်ဆေးသည်။
ထို့နောက် ပြည်ထောင်စုဝန်ကြီးနှင့် တိုင်းဒေသကြီးဝန်ကြီးချုပ်တို့သည် ကော့သောင်းမြို့၊ မြို့မဆိပ်ခံတံတားယာယီဖွင့်လှစ်ဆောင်ရွက်မည့်နေရာနှင့် လူဝင်မှုစစ်ဆေးရေးဆိုင်ရာ ယာယီရုံး တည်ဆောက်မည့် မြေနေရာတို့ကို ကြည့်ရှုစစ်ဆေးပြီး မြို့မတံတားရှင်းလင်းဆောင်၌ နောင်ရိုးမြန်မာကုမ္ပဏီမှ လုပ်ငန်းတာဝန်ခံက ကော့သောင်းမြို့ အပြည်ပြည်ဆိုင်ရာ နယ်စပ် စစ်ဆေးရေးဂိတ်အသစ် တည်ဆောက်ရေးလုပ်ငန်းဆောင်ရွက်မည့် အစီအစဉ်များ၊ ဌာနဆိုင်ရာ ရုံးခန်းများဖွဲ့စည်းတည်ဆောက်မည့် အခြေအနေများကို ရှင်းလင်းတင်ပြရာ ပြည်ထောင်စုဝန်ကြီး နှင့် တိုင်းဒေသကြီးဝန်ကြီးချုပ်တို့က လိုအပ်သည်များ ညှိနှိုင်းဖြည့်ဆည်း ဆောင်ရွက်ပေးသည်။
ယင်းနောက် ပြည်ထောင်စုဝန်ကြီးနှင့် တိုင်းဒေသကြီးဝန်ကြီးချုပ်တို့သည် မြို့မတံတားရှိ လူဝင်မှုစစ်ဆေးရေး ဒုတိယဌာနခွဲရှိ Passport ဖြင့် ဝင်ထွက်သွားလာသည့် နိုင်ငံခြားသားများ စစ်ဆေးရေး ကောင်တာနှင့် BP / TBP စစ်ဆေးထုတ်ပေးရေး ကောင်တာတို့ကို သွားရောက်ကြည့်ရှု စစ်ဆေးပြီး တာဝန်ရှိသူများအား လိုအပ်သည်များမှာကြားသည်။
ထိုမှတစ်ဆင့် ပြည်ထောင်စုဝန်ကြီးနှင့် တိုင်းဒေသကြီးဝန်ကြီးချုပ်တို့သည် မြို့မတံတားမှ ရေယာဉ်ဖြင့်ထွက်ခွာ၍ မြွေတော်ကျွန်း၊ ရတနာကျွန်းနှင့် သူဌေးကျွန်းတို့ရှိ လူဝင်မှုစစ်ဆေးရေးဂိတ် များသို့ လှည့်လည်ကြည့်ရှုစစ်ဆေးကာ လုပ်ငန်းဆောင်ရွက်နေမှုအခြေအနေများနှင့်စပ်လျဉ်း၍ တာဝန်ရှိသူများ၏ လိုက်လံရှင်းလင်းတင်ပြချက်များအပေါ် ပြည်ထောင်စုဝန်ကြီးက နယ်စပ်စစ်ဆေး ရေးဂိတ်များဖြစ်ပြီး သီးသန့်ကျွန်းများတွင်လုပ်ငန်းများဆောင်ရွက်ရသည့်အတွက် လူဝင်မှုကြီးကြပ်ရေး ဆိုင်ရာ လုပ်ထုံးလုပ်နည်းနှင့်အညီ စနစ်တကျစစ်ဆေးဆောင်ရွက်ရေး၊ ထူးခြားဖြစ်စဉ်များအား အချိန်နှင့်တစ်ပြေးညီ တင်ပြဆောင်ရွက်ရေးမှာကြားကာ လိုအပ်သည်များဖြည့်ဆည်း ဆောင်ရွက် ပေးခဲ့ကြောင်း သတင်းရရှိသည်။ ( – )
Sorry, the comment form is closed at this time.